അയോധ്യ രാമക്ഷേത്ര സംഭാവന തട്ടിപ്പ് കേസിൽ അറസ്റ്റിലായ മുഖ്യപ്രതി അനുകൽപ് മിശ്ര നയിക്കുന്നത് ആഡംബര ജീവിതം

അയോധ്യ രാമക്ഷേത്ര സംഭാവന തട്ടിപ്പ് കേസിൽ അറസ്റ്റിലായ മുഖ്യപ്രതി അനുകൽപ് മിശ്രയുടെയും മറ്റ് പ്രതികളുടെയും ആഡംബര ജീവിതശൈലിയെക്കുറിച്ചുള്ള ഞെട്ടിക്കുന്ന വിവരങ്ങളാണ് പുറത്തുവരുന്നത്. ക്ഷേത്രത്തിലെ സംഭാവന പെട്ടിയിലെ പണം എണ്ണുന്ന സംഘത്തിൽ അംഗമായിരുന്ന പ്രതികൾ കോടിക്കണക്കിന് രൂപ തട്ടിയെടുത്തതായാണ് പ്രത്യേക അന്വേഷണ സംഘത്തിന്റെ കണ്ടെത്തൽ.ഗ്രാമത്തിലെ സാധാരണ ചുറ്റുപാടിൽ കഴിഞ്ഞിരുന്ന അനുകൽപ്, അയോധ്യയിലെ ബസവ ഗ്രാമത്തിൽ ഏറ്റവും ആഡംബരമുള്ള വീട് നിർമ്മിച്ചു. കൂടാതെ ഗ്രാമത്തിന്റെ പുറമ്പോക്കിൽ ഒരു ഫാംഹൗസും, അയോധ്യ നഗരത്തിൽ കഴിഞ്ഞ വർഷം 65 ലക്ഷം രൂപ വിലമതിക്കുന്ന മറ്റൊരു വീടും വാങ്ങി. അനുകൽപിന്റെ ഭാര്യാസഹോദരനായ ലവ്കുഷ് വാടകവീട്ടിലാണ് താമസിക്കുന്നതെങ്കിലും അടുത്തിടെ ഒരു ലക്ഷത്തിലധികം രൂപ വിലവരുന്ന പുതിയ മോട്ടോർസൈക്കിൾ വാങ്ങി. അനുകൽപ് വഴിയാണ് ഇയാൾ പണം എണ്ണുന്ന സംഘത്തിൽ കയറിയത്. അറസ്റ്റിലായ പ്രതികളുടെ വീടുകളിൽ നടത്തിയ ഒരേസമയത്തുള്ള റെയ്ഡുകളിൽ നിന്നായി ഇതുവരെ 79.85 ലക്ഷം രൂപ പോലീസ് പിടിച്ചെടുത്തു. ഇതിൽ പ്രതിയായ അവിനാശ് ശുക്ലയുടെ പക്കൽ നിന്ന് മാത്രം 20 ലക്ഷം രൂപയാണ് കണ്ടെടുത്തത്.ക്ഷേത്ര സംഭാവനകൾ എണ്ണുന്ന ജീവനക്കാരായ 8 പ്രതികളുടെയും ബാങ്ക് അക്കൗണ്ടുകൾ, സ്വത്ത് വിവരങ്ങൾ, നിക്ഷേപങ്ങൾ എന്നിവ പോലീസ് വിശദമായി പരിശോധിച്ചുവരികയാണ്. ഈ ആസ്തികളെല്ലാം മോഷ്ടിച്ച പണം ഉപയോഗിച്ച് സമ്പാദിച്ചതാണോ എന്ന് കണ്ടെത്താനാണ് അന്വേഷണ സംഘത്തിന്റെ നീക്കം.