ദീർഘകാലിക വളർച്ചയ്ക്കും സാമ്പത്തിക അച്ചടക്കത്തിനും റിലയൻസ് ഇൻഡസ്ട്രീസ് എപ്പോഴും പ്രതിജ്ഞാബദ്ധമാണെന്ന് ഇഷ അംബാനി

മൂന്ന് തലമുറകൾ കഴിഞ്ഞിട്ടും താനും ആകാശും അനന്തും "വളർച്ചയാണ് ജീവിതം" എന്ന ആപ്തവാക്യത്തിൽ ഉറച്ചുനിൽക്കുന്നുവെന്ന് ഇഷ അംബാനി പറഞ്ഞു. സ്ഥാപകന്റെ ദർശനം മാത്രമല്ല, അദ്ദേഹത്തിൽ വിശ്വസിച്ച് ഒപ്പം നിന്ന ലക്ഷക്കണക്കിന് ഓഹരി ഉടമകളുടെ വിശ്വാസവുമാണ് തങ്ങൾ മുന്നോട്ട് കൊണ്ടുപോകുന്നതെന്നും അവർ കൂട്ടിച്ചേർത്തു. ദീർഘകാലിക വളർച്ചയ്ക്കും സാമ്പത്തിക അച്ചടക്കത്തിനും ഓഹരി ഉടമകൾക്കായി മൂല്യം സൃഷ്ടിക്കുന്നതിനും റിലയൻസ് ഇൻഡസ്ട്രീസ് എപ്പോഴും പ്രതിജ്ഞാബദ്ധമാണെന്ന് റിലയൻസ് നോൺ-എക്സിക്യൂട്ടീവ് ഡയറക്ടർ ഇഷ അംബാനി. ഏറെ പ്രതീക്ഷയോടെ കാത്തിരിക്കുന്ന ജിയോ പ്ലാറ്റ്‌ഫോംസിന്റെ ഐ.പി.ഒ-ക്ക് മുന്നോടിയായി, കമ്പനിയുടെ ആശയങ്ങളും ലക്ഷ്യങ്ങളും വിശദീകരിക്കുകയായിരുന്നു അവർ. റിലയൻസ് സ്ഥാപകൻ ധീരുഭായ് അംബാനിയുടെ സ്വപ്നങ്ങളെക്കുറിച്ച് ഓർമ്മിപ്പിച്ചുകൊണ്ട്, ഓരോ ഇന്ത്യക്കാരനും രാജ്യത്തിന്റെ സാമ്പത്തിക വളർച്ചയിലും പുരോഗതിയിലും പങ്കാളികളാകാൻ അവസരമൊരുക്കുകയാണ് റിലയൻസിന്റെ ലക്ഷ്യമെന്ന് അവർ വ്യക്തമാക്കി.