ട്രംപിന്റെ ക്രിപ്റ്റോ കറൻസി ബിസിനസ്സ് സാമ്രാജ്യം ഒരു വർഷം കൊണ്ട് ഒരു ബില്യൺ ഡോളറിലധികം വരുമാനം ഉണ്ടാക്കിയതായി റിപ്പോർട്ടുകൾ

അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ക്രിപ്റ്റോ കറൻസി ബിസിനസ്സ് സാമ്രാജ്യം വെറും ഒരു വർഷം കൊണ്ട് 1.2 ബില്യൺ ഡോളറിലധികം (ഏകദേശം 10,000 കോടിയിലധികം ഇന്ത്യൻ രൂപ) വരുമാനം ഉണ്ടാക്കിയതായി ഔദ്യോഗിക സാമ്പത്തിക രേഖകൾ വ്യക്തമാക്കുന്നു. യുണൈറ്റഡ് സ്റ്റേറ്റ്സ് ഓഫീസ് ഓഫ് ഗവൺമെന്റ് എത്തിക്സ് പുറത്തുവിട്ട 927 പേജുകളുള്ള വാർഷിക സാമ്പത്തിക വെളിപ്പെടുത്തൽ റിപ്പോർട്ടിലാണ് ഈ വിവരങ്ങളുള്ളത്. ട്രംപും അദ്ദേഹത്തിന്റെ മക്കളും ചേർന്ന് 2024-ൽ ആരംഭിച്ച ഈ ക്രിപ്റ്റോ പ്ലാറ്റ്‌ഫോമിലെ ടോക്കൺ വിൽപനയിലൂടെ മാത്രം 500 മില്യൺ ഡോളറിലധികം  വരുമാനം ലഭിച്ചു. 
ട്രംപ് പതിറ്റാണ്ടുകളായി കെട്ടിപ്പടുത്ത വലിയ ഹോട്ടലുകൾ, ഗോൾഫ് റിസോർട്ടുകൾ തുടങ്ങിയ റിയൽ എസ്റ്റേറ്റ് ബിസിനസ്സുകളിൽ നിന്നുള്ള വരുമാനത്തെക്കാൾ വളരെ കൂടുതലാണ് ഇപ്പോൾ ക്രിപ്റ്റോയിൽ നിന്ന് അദ്ദേഹത്തിന് ലഭിക്കുന്നത്. ക്രിപ്റ്റോയിൽ നിന്നുള്ള ഈ വൻ നേട്ടം കാരണം ഫോബ്‌സ് മാസികയുടെ കണക്കനുസരിച്ച് ട്രംപിന്റെ ആകെ ആസ്തി 2024-ലെ 2.3 ബില്യൺ ഡോളറിൽ നിന്ന് 6 ബില്യൺ ഡോളറായി ഉയർന്നു. ക്രിപ്റ്റോയ്ക്ക് പുറമെ ട്രംപ് ബ്രാൻഡ് ചെയ്ത വാച്ചുകളുടെ വിൽപനയിലൂടെ 4.7 മില്യൺ ഡോളറും, വിവിധ മാധ്യമ കമ്പനികളുമായുള്ള നിയമപരമായ ഒത്തുതീർപ്പുകളിലൂടെ 80 മില്യൺ ഡോളറും അദ്ദേഹം സ്വന്തമാക്കിയിട്ടുണ്ട്.