എംജിആർ എംജിആർ തന്നെയാണ് ഞാൻ നിങ്ങളുടെ വിജയ്‍ ആണ്

തമിഴ്‌നാട് മുഖ്യമന്ത്രിയും ടിവികെ നേതാവുമായ വിജയ് തിരുച്ചിറപ്പള്ളിയിൽ നടന്ന നന്ദിപ്രകാശന റാലിയിൽ വെച്ച് എംജിആറുമായുള്ള രാഷ്ട്രീയ താരതമ്യങ്ങളെക്കുറിച്ച് പരാമർശം നടത്തി. തന്റെ പാർട്ടിയായ തമിഴക വെട്രി കഴകം ആദ്യ തിരഞ്ഞെടുപ്പിൽ നേടിയ വോട്ട് വിഹിതത്തെ ഇതിഹാസ നേതാവ് എം.ജി. രാമചന്ദ്രന്റെ ആദ്യ തിരഞ്ഞെടുപ്പ് പ്രകടനവുമായി താരതമ്യം ചെയ്താണ് വിജയ് സംസാരിച്ചത്. അന്തരിച്ച മുൻ മുഖ്യമന്ത്രി എംജിആർ തന്റെ ആദ്യ തിരഞ്ഞെടുപ്പിൽ മത്സരിച്ചപ്പോൾ പോലും ഇത്രയും വലിയൊരു വോട്ട് വിഹിതം നേടിയിട്ടില്ലെന്ന് പലരും ചൂണ്ടിക്കാണിച്ചതായി വിജയ് റാലിയിൽ പറഞ്ഞു.
താൻ ഒരിക്കലും സ്വയം എംജിആറിന് മുകളിൽ പ്രതിഷ്ഠിക്കാൻ ആഗ്രഹിക്കുന്നില്ലെന്നും അദ്ദേഹവുമായി താരതമ്യം ചെയ്യുകയല്ലെന്നും വിജയ് വ്യക്തമാക്കി. എംജിആർ എംജിആർ തന്നെയാണ്, ഞാൻ നിങ്ങളുടെ വിജയ്‍ ആണ് എന്നായിരുന്നു അദ്ദേഹത്തിന്റെ വാക്കുകൾ. എംജിആർ, അണ്ണാദുരൈ, പെരിയാർ എന്നിവർ കാണിച്ചുതന്ന സാമൂഹിക നീതിയുടെയും വികസനത്തിന്റെയും പാതയിലൂടെ ജനങ്ങൾക്കായി പ്രവർത്തിക്കാനാണ് താൻ വന്നിരിക്കുന്നതെന്ന് അദ്ദേഹം കൂട്ടിച്ചേർത്തു.