കേരളപ്പിറവി ദിനം നമ്മുടെ നാടിൻറെ ജന്മദിനം

കേരളപ്പിറവി ദിനം ...നമ്മുടെ നാടിൻറെ ജന്മദിനം.   ഭാഷാടിസ്ഥാനത്തിൽ സംസ്ഥാനങ്ങൾ പുനഃസംഘടിപ്പിക്കാനുള്ള ഭാരത സർക്കാരിന്റെ തീരുമാനപ്രകാരം 1956 നവംബർ ഒന്നിനാണ് മലയാളം സംസാരിക്കുന്ന ജനവിഭാഗങ്ങളെ ഒന്നിപ്പിച്ചുകൊണ്ട് കേരള സംസ്ഥാനം നിലവിൽ വന്നത്. പരസ്പരം വേർപെട്ടുകിടന്നിരുന്ന മൂന്ന് പ്രദേശങ്ങൾ ഒന്നിച്ച് ഒരു ജനതയായി മാറിയതിന്റെ ആവേശകരമായ ചരിത്രമാണ് കേരളപ്പിറവിക്കുള്ളത്. മലയാളം സംസാരിക്കുന്ന ജനങ്ങൾക്കായി ഒരു ഏകീകൃത സംസ്ഥാനം വേണമെന്ന ചിന്ത ഇരുപതാം നൂറ്റാണ്ടിന്റെ തുടക്കത്തിൽ തന്നെ ശക്തമായിത്തുടങ്ങിയിരുന്നു. ഇതാണ് 'ഐക്യകേരള പ്രസ്ഥാനം' എന്ന പേരിൽ അറിയപ്പെടുന്നത്. 

മലനാട്, ഇടനാട്, തീരനാട് എന്നിങ്ങനെ മൂന്നായി തരം തിരിച്ചിരിക്കുന്ന ഈ ഭൂമി കായലുകളാലും പുഴകളാലും സമൃദ്ധമാണ്. തുലാവർഷവും ഇടവപ്പാതിയും സമ്മാനിക്കുന്ന ഹരിതാഭ കേരളത്തിന്റെ മാത്രം പ്രത്യേകതയാണ്. സാംസ്കാരികമായി കേരളം എന്നും ഒരു മതേതര ഭൂമിയാണ്. ലോകത്തിലെ പ്രധാനപ്പെട്ട എല്ലാ മതവിഭാഗങ്ങളും നൂറ്റാണ്ടുകളായി ഇവിടെ സമാധാനത്തോടെയും പരസ്പര സൗഹാർദ്ദത്തോടെയും കഴിഞ്ഞുവരുന്നു. 
വികസിത രാജ്യങ്ങളോട് കിടപിടിക്കുന്ന സാമൂഹിക വികസന നേട്ടങ്ങൾ കൈവരിച്ചതിലൂടെ ലോകമെമ്പാടുമുള്ള സാമ്പത്തിക ശാസ്ത്രജ്ഞരുടെയും സാമൂഹിക പ്രവർത്തകരുടെയും ശ്രദ്ധ പിടിച്ചുപറ്റാൻ കേരളത്തിന് സാധിച്ചിട്ടുണ്ട്. 

കേരളപ്പിറവി ദിനം കേവലം ഒരു ആഘോഷം മാത്രമല്ല, മറിച്ച് നമ്മുടെ ഭൂതകാല ചരിത്രത്തെ ഓർമ്മിപ്പിക്കാനും ഭാവിയിലേക്കുള്ള പ്രയാണത്തിന് കരുത്തുപകരാനുമുള്ള ഒരു അവസരമാണ്. ജാതിയുടെയോ മതത്തിന്റെയോ രാഷ്ട്രീയത്തിന്റെയോ വേലിക്കെട്ടുകളില്ലാതെ 'മലയാളി' എന്ന ഒറ്റ വികാരത്തിൽ ഒന്നിച്ച് നിൽക്കാൻ ഈ ദിനം നമ്മെ പ്രേരിപ്പിക്കുന്നു.