തന്റെ കറുപ്പും വെളുപ്പും സ്യൂട്ടുകൾക്ക് പിന്നിലെ രാഷ്ട്രീയം വ്യക്തമാക്കി വിജയ്

തന്റെ കറുപ്പും വെളുപ്പും സ്യൂട്ടുകൾക്ക് പിന്നിലെ രാഷ്ട്രീയം വ്യക്തമാക്കി വിജയ് രംഗത്തെത്തി. തന്റെ രാഷ്ട്രീയം കറുപ്പും വെളുപ്പും പോലെ സുതാര്യമായിരിക്കുമെന്ന സന്ദേശമാണ് ഈ വസ്ത്രങ്ങൾ നൽകുന്നത്. അനാവശ്യമായ കാപട്യങ്ങളോ 'ഗ്രേ ഏരിയകളോ'തന്റെ ഭരണത്തിൽ ഉണ്ടാകില്ലെന്ന് അദ്ദേഹം വ്യക്തമാക്കി. കറുപ്പും വെളുപ്പും സാധാരണ ജനങ്ങളുടെ ഹൃദയത്തിന്റെ നിറങ്ങളാണെന്നും, അത് ലളിതവും സത്യസന്ധവുമായ ജനപക്ഷ നിലപാടിനെ സൂചിപ്പിക്കുന്നുവെന്നും വിജയ് പറഞ്ഞു. രാഷ്ട്രീയത്തിൽ കോട്ടും സ്യൂട്ടും ധരിക്കുന്നത് ചില പ്രത്യേക വിഭാഗങ്ങൾക്കോ അധികാരത്തിലുള്ളവർക്കോ മാത്രമായി പരിമിതപ്പെടുത്തിയിട്ടുണ്ടോ എന്ന് അദ്ദേഹം ചോദിച്ചു. സാധാരണക്കാരിലേക്ക് ഈ വസ്ത്രധാരണത്തെ ജനാധിപത്യവൽക്കരിക്കുകയാണ് താൻ ചെയ്യുന്നതെന്ന് അദ്ദേഹം കൂട്ടിച്ചേർത്തു. കറുപ്പ് നിറത്തിന് തമിഴ്‌നാട്ടിലെ സാമൂഹിക നീതി, ആത്മാഭിമാന പ്രസ്ഥാനങ്ങളുമായി ആഴത്തിലുള്ള ചരിത്രപരമായ ബന്ധമുണ്ടെന്നും, അതിന്റെ അർത്ഥം ജനങ്ങൾക്ക് നന്നായി അറിയാമെന്നും വിജയ് സൂചിപ്പിച്ചു. 

തമിഴ്‌നാട് രാഷ്ട്രീയത്തിൽ പതിറ്റാണ്ടുകളായി നിലനിൽക്കുന്ന പരമ്പരാഗത വെള്ള ഷർട്ടും മുണ്ടും ഉപേക്ഷിച്ച്, മുഖ്യമന്ത്രിയായി സത്യപ്രതിജ്ഞ ചെയ്ത നാൾ മുതൽ വിജയ് ഈ കറുപ്പും വെളുപ്പും സ്യൂട്ടാണ് തന്റെ സ്ഥിരം വസ്ത്രമായി തിരഞ്ഞെടുത്തിരിക്കുന്നത്. ഇത് കേവലം ഒരു ഫാഷൻ സ്റ്റേറ്റ്‌മെന്റല്ല, മറിച്ച് തന്റെ രാഷ്ട്രീയ ആശയങ്ങളുടെ ദൃശ്യാവിഷ്കാരമാണെന്ന് അദ്ദേഹം ഉറപ്പിച്ചു പറഞ്ഞു