പ്രൊവിഡൻ്റ് ഫണ്ട് എങ്ങനെ, എപ്പോൾ പിൻവലിക്കാം പുതിയ നിയമങ്ങൾ ഇപിഎഫ്ഒ അവതരിപ്പിച്ചു

പ്രൊവിഡൻ്റ് ഫണ്ട്  എങ്ങനെ, എപ്പോൾ പിൻവലിക്കാം എന്നതുമായി ബന്ധപ്പെട്ട് പുതിയ നിയമങ്ങൾ എംപ്ലോയീസ് പ്രൊവിഡൻ്റ് ഫണ്ട് ഓർഗനൈസേഷൻ അവതരിപ്പിച്ചു. ഒക്ടോബർ 13-ന് നടന്ന സെൻട്രൽ ബോർഡ് ഓഫ് ട്രസ്റ്റീസ് യോഗത്തിലാണ് ഈ മാറ്റങ്ങൾക്ക് അംഗീകാരം നൽകിയത്. മുമ്പ്, ജോലി ഉപേക്ഷിച്ച് രണ്ട് മാസത്തിന് ശേഷം അംഗങ്ങൾക്ക് അവരുടെ മുഴുവൻ പിഎഫ് തുകയും പിൻവലിക്കാൻ സാധിക്കുമായിരുന്നു. പുതിയ നിയമം അനുസരിച്ച്, ജോലി നഷ്ടപ്പെട്ട ജീവനക്കാർക്ക് 12 മാസത്തെ തൊഴിലില്ലായ്മയ്ക്ക് ശേഷം മാത്രമേ അവരുടെ അവസാന പിഎഫ് തുക പിൻവലിക്കാൻ സാധിക്കുകയുള്ളൂ. പിഎഫിൻ്റെ പെൻഷൻ ഭാഗം 36 മാസത്തിന് ശേഷം മാത്രമേ പിൻവലിക്കാൻ കഴിയൂ. വിഷമകരമായ സമയങ്ങളിൽ സാമ്പത്തിക ആവശ്യങ്ങൾക്കായി പിഎഫ് ഉപയോഗിക്കാൻ അനുവദിക്കുമ്പോൾ തന്നെ വിരമിക്കൽ സമ്പാദ്യം സുരക്ഷിതമാക്കാൻ കൂടിയാണ് ഈ മാറ്റമെന്ന് ഇപിഎഫ്ഒ വ്യക്തമാക്കി. പുതിയ മാർഗ്ഗനിർദ്ദേശങ്ങൾ അനുസരിച്ച്, ജോലി നഷ്ടപ്പെടുന്ന ആർക്കും അവരുടെ അവസാന പിഎഫ് തുക പിൻവലിക്കാൻ ഒരു വർഷം കാത്തിരിക്കേണ്ടി വരും.