വിമാനാപകടത്തിൽ നഷ്ടമായ സമുന്നത നേതാക്കൾ

അഹമ്മദാബാദിലുണ്ടായ വിമാനാപകടത്തിൽ  ജീവൻ പൊലിഞ്ഞവരുടെ കൂട്ടത്തിൽ ഇന്ത്യൻ രാഷ്ട്രീയത്തിലെ പ്രബലനായ വിജയ് രൂപാണിയും ഉണ്ടായിരുന്നു. വർഷങ്ങളായി ഇന്ത്യയ്ക്ക് നിരവധി രാഷ്ട്രീയക്കാരെ വിമാനാപകടങ്ങളിൽ നഷ്ടപ്പെട്ടിട്ടുണ്ട്. യുവ കോൺഗ്രസ് നേതാവായ സഞ്ജയ് ഗാന്ധി 1980 ജൂൺ 23 ന് ഡൽഹിയിൽ ഒരു വിമാനാപകടത്തിൽ മരിച്ചു. 33 കാരനായ അദ്ദേഹം രണ്ട് സീറ്റർ വിമാനം പറത്തുന്നതിനിടെ സഫ്ദർജംഗ് വിമാനത്താവളത്തിന് സമീപം ഒരു പരീക്ഷണ പറക്കലിനിടെയാണ് മരണപ്പെട്ടത്. മുതിർന്ന കോൺഗ്രസ് നേതാവും കേന്ദ്രമന്ത്രി ജ്യോതിരാദിത്യ സിന്ധ്യയുടെ പിതാവുമായ മാധവറാവു സിന്ധ്യ 2001 സെപ്റ്റംബർ 30 ന് ഉത്തർപ്രദേശിലെ മെയിൻപുരി ജില്ലയിലെ ഭോഗാവിൽ നടന്ന ഒരു ചാർട്ടേഡ് വിമാനാപകടത്തിൽ അദ്ദേഹം മരിച്ചു. 

2002 മാർച്ച് 3 ന് ആന്ധ്രാപ്രദേശിലെ പശ്ചിമ ഗോദാവരി ജില്ലയിൽ നടന്ന ഒരു ഹെലികോപ്റ്റർ അപകടത്തിൽ അന്നത്തെ ലോക്‌സഭാ സ്പീക്കറും തെലുങ്കുദേശം പാർട്ടി  നേതാവുമായ ബാലയോഗി അപകടത്തിൽപെട്ടു ജീവൻ പൊലിഞ്ഞു. 2011 ഏപ്രിൽ 30 ന് ചൈന അതിർത്തിക്കടുത്തു ഹെലികോപ്റ്റർ തകർന്ന് അന്നത്തെ അരുണാചൽ പ്രദേശ് മുഖ്യമന്ത്രിയായിരുന്ന ദോർജി ഖണ്ഡു മരിച്ചു. അഞ്ച് ദിവസത്തിന് ശേഷം അവശിഷ്ടങ്ങൾ കണ്ടെത്തി. വൈഎസ്ആർ എന്നറിയപ്പെടുന്ന വൈഎസ്ആർ രാജശേഖര റെഡ്ഡി 2009ലെ വിമാനാപകടത്തിൽ മരണപെട്ടു. വ്യവസായ പ്രവർത്തകനും ഹരിയാന ഊർജ്ജ മന്ത്രിയുമായ ഒ പി ജിൻഡാലും മുൻ കേന്ദ്രമന്ത്രി സുരേന്ദർ സിംഗും 2005ൽ ഉത്തർപ്രദേശിലെ സഹാറൻപൂരിൽ ഒരു ഹെലികോപ്റ്റർ അപകടത്തിൽ മരിച്ചു. നിരവധി സമുന്നത നേതാക്കളാണ് വിമാനാപകടത്തിൽ നമുക്ക് നഷ്ടമായത്.