ഇഡിയെ ആക്രമിച്ച കേസ് അന്വേഷിക്കാൻ കേരള പോലീസ് 30 അംഗ പ്രത്യേക അന്വേഷണ സംഘത്തെ രൂപീകരിച്ചു

മുൻ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയന്റെ തിരുവനന്തപുരത്തെ വസതിയിൽ റെയ്ഡ് നടത്തി മടങ്ങിയ എൻഫോഴ്സ്മെന്റ് ഡയറക്ടറേറ്റ് ഉദ്യോഗസ്ഥരെയും അവരുടെ വാഹനങ്ങളെയും ആക്രമിച്ച കേസ് അന്വേഷിക്കാൻ കേരള പോലീസ് 30 അംഗ പ്രത്യേക അന്വേഷണ സംഘത്തെ (SIT) രൂപീകരിച്ചു. സിഎംആർഎൽ-എക്സാലോജിക് മാസപ്പടി കേസുമായി ബന്ധപ്പെട്ട് ടി. വീണയുടെ വീട്ടിൽ പരിശോധന നടത്തുന്നതിന്റെ ഭാഗമായാണ് മെയ് 27-ന് ഇഡി സംഘം തിരുവനന്തപുരം ബേക്കറി ജങ്ഷനിലെ വസതിയിൽ എത്തിയത്. പരിശോധന കഴിഞ്ഞ് മടങ്ങിയ ഉദ്യോഗസ്ഥരെ സിപിഎം പ്രവർത്തകർ തടയുകയും ആക്രമിക്കുകയുമായിരുന്നു. 

കന്റോൺമെന്റ് അസിസ്റ്റന്റ് കമ്മീഷണർ അന്വേഷണത്തിന് നേരിട്ട് മേൽനോട്ടം വഹിക്കും. മ്യൂസിയം പോലീസ് സ്റ്റേഷൻ ഹൗസ് ഓഫീസർ ആർ. പ്രശാന്ത് ആണ് പ്രധാന അന്വേഷണ ചുമതലക്കാരൻ. 5 ഇൻസ്പെക്ടർമാരും 7 സബ് ഇൻസ്പെക്ടർമാരും അടക്കം 30 പോലീസ് ഉദ്യോഗസ്ഥർ ഈ പ്രത്യേക സംഘത്തിലുണ്ട്. കൂടാതെ കന്റോൺമെന്റ്, പൂജപ്പുര, പേരൂർക്കട, വട്ടിയൂർക്കാവ്, തമ്പാനൂർ സ്റ്റേഷനുകളിലെ എസ്‌എച്ച്‌ഒമാരും ഡിസ്ട്രിക്റ്റ് ക്രൈംബ്രാഞ്ച്, സൈബർ സെൽ എന്നിവരിൽ നിന്നുള്ള ഉദ്യോഗസ്ഥരും സംഘത്തിന്റെ ഭാഗമാണ്. കണ്ടാലറിയാവുന്ന മുന്നൂറോളം പേർക്കെതിരെയാണ് പോലീസ് കേസ് രജിസ്റ്റർ ചെയ്തിട്ടുള്ളത്. നിലവിൽ 26-ഓളം പേർ ഈ സംഭവവുമായി ബന്ധപ്പെട്ട് അറസ്റ്റിലായിട്ടുണ്ട്.