മനുഷ്യ-മൃഗ സംഘർഷം പരിഹരിക്കാൻ ഗോത്രഭേരി എന്ന പദ്ധതിക്ക് തുടക്കമിട്ട് കേരള വനം വകുപ്പ്

മനുഷ്യ-മൃഗ സംഘർഷം പരിഹരിക്കാൻ പുതിയ പദ്ധതിയുമായി കേരള വനം വകുപ്പ്. ഗോത്ര സമൂഹങ്ങളുടെ പരമ്പരാഗത അറിവ് ഒരുമിച്ച് ഗോത്രഭേരി എന്ന പദ്ധതിക്കാണ് തുടക്കമിട്ടത്. ഗോത്രവർഗ്ഗക്കാരുടെ പാരമ്പര്യ ജ്ഞാനത്തിലൂടെ മനുഷ്യരും വന്യജീവികളും തമ്മിലുള്ള സംഘർഷങ്ങൾ ലഘൂകരിക്കുന്നതിനുള്ള ഒരു പുതിയ ശ്രമമാണ് നടക്കുന്നത്. ഈ വർഷം കാട്ടാനകളുടെ ആക്രമണത്തിൽ കൊല്ലപ്പെട്ട 19 പേരിൽ 13 പേർ ആദിവാസികളാണെന്നും ആക്രമണങ്ങൾ വനപ്രദേശങ്ങൾക്കുള്ളിലാണെന്നും മനസ്സിലാക്കിയ ശേഷമാണ് സംസ്ഥാന സർക്കാർ ഗോത്രഭേരി എന്ന ആശയം മുന്നോട്ടുവച്ചതെന്ന് ഗോത്രഭേരിയുടെ അവസാന സംസ്ഥാനതല കൺവെൻഷൻ ഉദ്ഘാടനം ചെയ്തുകൊണ്ട് കേരള വനം മന്ത്രി എ കെ ശശീന്ദ്രൻ പറഞ്ഞു. "പ്രകൃതി സംരക്ഷണം, സുസ്ഥിര വികസനം, മനുഷ്യ-മൃഗ സംഘർഷ ലഘൂകരണം, സഹവർത്തിത്വം എന്നിവയെക്കുറിച്ചുള്ള അത്ഭുതകരമായ ആശയങ്ങൾ ഉയർന്നുവന്നിട്ടുണ്ട്. അവയെ ഒരുമിച്ച് കൊണ്ടുവന്ന് ഒരു മാനേജ്മെന്റ് ഉപകരണം രൂപപ്പെടുത്തുക എന്നതാണ് ഞങ്ങളുടെ ആശയമെന്ന് കേരള ഫോറസ്റ്റ് ഫോഴ്‌സ് മേധാവി പി പുഗഴേന്തി പറഞ്ഞു.