സംഗ മിത്രയുടെ ചിത്രവർണ്ണങ്ങൾ തലസ്ഥാനത്തെ കലാസ്വാദകരെ ആകർഷിച്ചു.Sangamitra'spaintingscapivstedartloversinthestate

സംഗമിത്രയുടെ ചിത്രവർണങ്ങൾ തലസ്ഥാനത്തെ കലാസ്വാദകരെ ആകർഷിച്ചു

തിരുവനന്തപുരം: കലയുടെ അതിരുകളില്ലാത്ത ലോകത്തെ ജനഹൃദയങ്ങളിലേക്ക് കൂടുതൽ അടുപ്പിച്ചുകൊണ്ട് സംഗമിത്ര ഫൈൻ ആർട്സ് സൊസൈറ്റിയുടെ 76-ാമത് ചിത്രകലാ പ്രദർശനം തിരുവനന്തപുരം മ്യൂസിയം ഓഡിറ്റോറിയത്തിൽ ശ്രദ്ധേയമായി നടന്നു. 

നിറങ്ങളും വരകളും ചേർന്ന് ജീവിതത്തിന്റെ വൈവിധ്യമാർന്ന അനുഭവങ്ങളെ ആവിഷ്കരിച്ച പ്രദർശനം കലാസ്വാദകർക്കും വിദ്യാർത്ഥികൾക്കും അപൂർവമായ ദൃശ്യാനുഭവമായി.

മനുഷ്യന്റെ സർഗാത്മകതയെയും ഭാവനയെയും പ്രോത്സാഹിപ്പിക്കുകയും കലാകാരന്മാർക്ക് അവരുടെ സൃഷ്ടികൾ പൊതുസമൂഹത്തിന് മുന്നിൽ അവതരിപ്പിക്കാനുള്ള വേദി ഒരുക്കുകയും ചെയ്യുക എന്ന ലക്ഷ്യത്തോടെയാണ് സംഗമിത്ര ഫൈൻ ആർട്സ് സൊസൈറ്റി വർഷങ്ങളായി പ്രവർത്തിച്ചുവരുന്നത്. കലയും കലാകാരന്മാരും സമൂഹത്തിന്റെ അമൂല്യമായ സാംസ്കാരിക സമ്പത്താണെന്ന സന്ദേശം പ്രദർശനത്തിലുടനീളം നിറഞ്ഞുനിന്നു.

സംഗമിത്ര ഫൈൻ ആർട്സ് സൊസൈറ്റിയുടെ ചെയർമാനും ഹരിവരാസനം ചാരിറ്റബിൾ ട്രസ്റ്റിന്റെ രക്ഷാധികാരിയുമായ വി. ശാന്താറാം ഐ.പി.എസ് (റിട്ട.) സംസാരിക്കവെ, കേരളത്തിന്റെ വിവിധ ഭാഗങ്ങളിൽ ഗവർണർമാർ, കലാ-സാഹിത്യ-സാംസ്കാരിക രംഗങ്ങളിലെ പ്രമുഖർ എന്നിവരുടെ പങ്കാളിത്തത്തോടെ സംഘടിപ്പിച്ച നിരവധി കലാപരിപാടികൾക്ക് ജനങ്ങളിൽനിന്ന് മികച്ച സ്വീകാര്യത ലഭിച്ചിട്ടുണ്ടെന്ന് പറഞ്ഞു. ആ പാരമ്പര്യം തുടർന്നുകൊണ്ട് സംഗമിത്രയെ കൂടുതൽ സജീവമാക്കാനുള്ള പ്രവർത്തനങ്ങൾ പുരോഗമിക്കുകയാണെന്നും അദ്ദേഹം വ്യക്തമാക്കി.

ദേശീയതലത്തിൽ പ്രവർത്തിക്കുന്ന ഹരിവരാസനം ചാരിറ്റബിൾ ട്രസ്റ്റിന്റെ ചെയർമാൻ പി. മോഹൻകുമാറും, സെക്രട്ടറി പ്രീതാ ടി.പി.യും പ്രദർശനം സന്ദർശിച്ചു. കലാകാരന്മാരുമായും കലാകാരികളുമായും സംവദിച്ച അവർ, വിവിധ കലാസൃഷ്ടികൾ നേരിൽ കണ്ട് അഭിനന്ദനം അറിയിച്ചു.

ഈ അവസരത്തിൽ സംസാരിച്ച പി. മോഹൻകുമാർ, ചിത്രകലയെന്നത് നിറങ്ങളുടെ സർവലൗകിക ഭാഷയാണെന്നും അത് മനുഷ്യന്റെ സൗന്ദര്യബോധത്തെ ഉണർത്തി മനസ്സിന് ശാന്തിയും സംതൃപ്തിയും പകരുന്ന ശക്തമായ മാധ്യമമാണെന്നും അഭിപ്രായപ്പെട്ടു. 

കലയും സാംസ്കാരിക പ്രവർത്തനങ്ങളും സമൂഹത്തിലെ നിഷേധാത്മക ചിന്തകളെ അകറ്റി നല്ല മൂല്യങ്ങളും മാനസിക ഉന്നമനവും വളർത്താൻ സഹായിക്കുമെന്നും അദ്ദേഹം പറഞ്ഞു. ഇത്തരം സത്‌പ്രവർത്തനങ്ങൾക്ക് ഹരിവരാസനം ചാരിറ്റബിൾ ട്രസ്റ്റിന്റെ പൂർണ പിന്തുണയും പ്രോത്സാഹനവും തുടർന്നും ഉണ്ടാകുമെന്നും അദ്ദേഹം കൂട്ടിച്ചേർത്തു.

പ്രദർശനത്തിൽ വിവിധ കലാകാരന്മാരുടെ ചിത്രങ്ങളും കലാസൃഷ്ടികളും പൊതുജനങ്ങൾക്ക് സൗജന്യമായി കാണാൻ അവസരം ഒരുക്കിയിരുന്നു. ജീവിതം, പ്രകൃതി, സംസ്കാരം, ആത്മീയത തുടങ്ങിയ വിഷയങ്ങളെ ആസ്പദമാക്കിയ സൃഷ്ടികൾ പ്രദർശനത്തിന്റെ പ്രധാന ആകർഷണങ്ങളായി. 

കലാസ്നേഹികൾക്കും വിദ്യാർത്ഥികൾക്കും കലാരംഗത്ത് പ്രവർത്തിക്കുന്നവർക്കും പുതിയ ചിന്തകളും പ്രചോദനവും സമ്മാനിച്ച കലോത്സവമായി സംഗമിത്രയുടെ 76-ാമത് ചിത്രകലാ പ്രദർശനം മാറി.