വിശ്വാസങ്ങളും ഭരണഘടനയും നാളെ നേർക്ക് നേർ നീതിപീഠത്തിന് മുന്നിലെ വൈതരണികളായി മതാചാരങ്ങളും.

വിശ്വാസവും ഭരണഘടനയും നാളെ നേര്‍ക്കുനേര്‍ നീതിപീഠത്തിന് മുന്നിലെ 'വൈതരണി'കളായി മതാചാരങ്ങളും.

ഇന്ത്യന്‍ ഭരണഘടനാ ചരിത്രത്തിലെ ഏറ്റവും നിര്‍ണ്ണായകമായ ഒരു ഘട്ടത്തിലൂടെയാണ് സുപ്രീം കോടതി ഇപ്പോള്‍ കടന്നുപോകുന്നത്. ഒന്‍പതംഗ ഭരണഘടനാ ബെഞ്ച് പരിഗണിക്കുന്ന മതപരമായ ആചാരങ്ങളെ സംബന്ധിച്ച കേസുകള്‍ കേവലം ചില വിശ്വാസങ്ങളെപ്പറ്റി മാത്രമുള്ളതല്ല, മറിച്ച് ആധുനിക ജനാധിപത്യത്തിലെ വ്യക്തിസ്വാതന്ത്ര്യവും ലിംഗസമത്വവും മതനിയമങ്ങളുമായി എങ്ങനെ പൊരുത്തപ്പെടണം എന്നതിനെക്കുറിച്ചുള്ള ഗൗരവകരമായ അന്വേഷണമാണ്.

കോടതി പരിഗണിക്കുന്ന നാല് കേസുകളും അടിസ്ഥാനപരമായി ഉയര്‍ത്തുന്നത് ഒരു ചോദ്യം തന്നെയാണ്

മുസ്ലിം സ്ത്രീകളുടെ പള്ളി പ്രവേശനവും, അന്യമതസ്ഥരെ വിവാഹം കഴിച്ച പാഴ്സി സ്ത്രീകളുടെ അവകാശങ്ങളും, ദാവൂദി ബോറ വിഭാഗത്തിലെ പെണ്‍?കുട്ടികളിലെ ക്രൂരമായ ചേലാകര്‍മവും, ശബരിമലയിലെ യുവതീപ്രവേശനവുമെല്ലാം വിരല്‍ ചൂണ്ടുന്നത് ഒരേയൊരു ചോദ്യത്തിലേക്കാണ്; *മതപരമായ ആചാരങ്ങള്‍ ഭരണഘടന ഉറപ്പുനല്‍കുന്ന മൗലികാവകാശങ്ങള്‍ക്ക് മുകളിലാണോ?

ദാവൂദി ബോറ വിഭാഗത്തിലെ ചേലാകര്‍മം (FGM) പോലുള്ള ക്രൂരമായ ആചാരങ്ങള്‍ മനുഷ്യാവകാശ ലംഘനങ്ങളുടെ പ്രഥമ ഗണത്തിലാണ് വരുന്നത്. ഒരു കുട്ടിക്ക് തന്‍റെ ശരീരത്തിന്മേലുള്ള അവകാശത്തെപ്പോലും ചോദ്യം ചെയ്യുന്ന ഇത്തരം നികൃഷ്ടവും ക്രൂരവുമായ പാരമ്പര്യങ്ങളെ തിരുത്താന്‍ കോടതിയുടെ ശക്തമായ ഇടപെടല്‍ അനിവാര്യമാണ്. അതുപോലെതന്നെ, ആരാധനാലയങ്ങളിലെ ലിംഗവിവേചനം ഭരണഘടനയുടെ 14, 15 അനുച്ഛേദങ്ങളുടെ ലംഘനവുമാണ്. ഭരണഘടനാപരമായ ധാര്‍മ്മികത' എന്ന തത്വം ഇവിടെയാണ് പ്രസക്തമാകുന്നത്

കേരള രാഷ്ട്രീയത്തിലെ 'ശബരിമല' വൈതരണി

കേരളത്തെ സംബന്ധിച്ചിടത്തോളം ഈ കേസിന് നിര്‍ണ്ണായക പ്രാധാന്യമുണ്ട്. ഈ കോടതി നടപടികള്‍ കേവലം നിയമപരം മാത്രമല്ല, കടുത്ത രാഷ്ട്രീയ പ്രത്യാഘാതങ്ങള്‍കൂടി ഉള്ളവയാണ്. 2007 മുതല്‍ വിവിധ സര്‍ക്കാരുകള്‍ സ്വീകരിച്ച നിലപാടുകളിലെ മാറ്റം ഈ വിഷയത്തിന്‍റെ രാഷ്ട്രീയ പ്രാധാന്യം വ്യക്തമാക്കുന്നു. മാത്രമല്ല *നിയമസഭാ തിരഞ്ഞെടുപ്പുകള്‍ ഒരു വിളിപ്പാടകലെ നില്‍ക്കുമ്പോള്‍ ഈ വിഷയത്തില്‍ സര്‍ക്കാര്‍ കൈക്കൊള്ളുന്ന തീരുമാനത്തെക്കൂടി ആശ്രയിച്ചായിരിക്കും തെരഞ്ഞെടുപ്പിലെ വിധിനിര്‍ണ്ണയം

വി.എസ്. സര്‍ക്കാരും പിണറായി സര്‍ക്കാരും യുവതീപ്രവേശനത്തെ അനുകൂലിച്ചപ്പോള്‍ ഉമ്മന്‍ചാണ്ടി സര്‍ക്കാര്‍ അതിനെ എതിര്‍ക്കുകയായിരുന്നു. 

നിയമസഭാ തിരഞ്ഞെടുപ്പ് പടിവാതില്‍ക്കല്‍ നില്‍ക്കെ ഈ വിഷയം വീണ്ടും ചര്‍ച്ചയാകുന്നത് ഇടതുപക്ഷ സര്‍ക്കാരിന് വലിയൊരു 'വൈതരണി'യായി മാറിയിരിക്കുകയാണ്. 2019-ലെ ലോക്സഭാ തിരഞ്ഞെടുപ്പില്‍ വിശ്വാസികളുടെ അമര്‍ഷം വോട്ടായി മാറിയത് നാം കണ്ടതാണ്. ഇടതുപക്ഷം ക്ഷേമ പ്രവര്‍ത്തനങ്ങളെ മുന്‍നിറുത്തി തുടര്‍ഭരണത്തിനായി ശ്രമിക്കുമ്പോഴും ഭരണവിരുദ്ധ വികാരം നിലനില്‍ക്കുന്ന ഒരു പശ്ചാത്തലത്തില്‍, ശബരിമല വിഷയം വീണ്ടും സജീവമാകുന്നത് പ്രതിപക്ഷത്തിന് വലിയൊരു രാഷ്ട്രീയ ആയുധമാകും.

സര്‍ക്കാരിന്‍റെ വെല്ലുവിളി

വികസന നേട്ടങ്ങളും ക്ഷേമപദ്ധതികളും ഉയര്‍ത്തിക്കാട്ടി വോട്ട് ചോദിക്കാന്‍ ആഗ്രഹിക്കുന്ന സര്‍ക്കാരിനെ സംബന്ധിച്ചിടത്തോളം, ചര്‍ച്ചകള്‍ വീണ്ടും 'വിശ്വാസത്തിലേക്ക്' മാറുന്നത് ദോഷകരമാണ്. നവോത്ഥാന മൂല്യങ്ങള്‍ മുറുകെ പിടിക്കുമ്പോള്‍ തന്നെ വിശ്വാസികളെ പിണക്കാതിരിക്കുക എന്ന 'ഇരുതല മൂര്‍ച്ചയുള്ള വാളിന്' മുകളിലൂടെയാണ് ഇടതുപക്ഷത്തിന്‍റെ സഞ്ചാരം. *'വിധി എന്തുതന്നെയായാലും എല്ലാവരുമായും ചര്‍ച്ച ചെയ്ത് മാത്രമേ നടപ്പിലാക്കൂ' എന്ന മൃദുസമീപനം സ്വീകരിച്ചുകൊണ്ട് ഈ പ്രതിസന്ധി മറികടക്കാനാണ് സര്‍ക്കാര്‍ ഇപ്പോള്‍ ശ്രമിക്കുവാന്‍ സാധ്യതയുള്ളതെന്ന് കരുതേണ്ടിവരുന്നു.

എന്തായാലും കാലഹരണപ്പെട്ടതും മനുഷ്യത്വവിരുദ്ധവുമായ ആചാരങ്ങള്‍ തിരുത്തപ്പെടണം എന്നതില്‍ തര്‍ക്കമില്ല. 

വിശ്വാസത്തേക്കാള്‍ മനുഷ്യാവകാശങ്ങള്‍ക്കും ലിംഗസമത്വത്തിനും പ്രാധാന്യം നല്‍കുന്ന ഒരു വിധിന്യായമാണ് നീതിപീഠത്തില്‍ നിന്ന് രാജ്യം പ്രതീക്ഷിക്കുന്നത്*. രാഷ്ട്രീയ തന്ത്രങ്ങള്‍ക്കും വൈകാരിക പ്രകടനങ്ങള്‍ക്കും അപ്പുറം, ഇന്ത്യന്‍ ഭരണഘടനയുടെ അന്തസത്ത ഉയര്‍ത്തിപ്പിടിക്കുന്ന ഒരു ചരിത്രപരമായ തീരുമാനം ഈ ഒന്‍പതംഗ ബെഞ്ചില്‍ നിന്ന് കാത്തിരിക്കുന്നു.(പുല്ലൂടൻ)