2031 ആകുമ്പോഴേക്കും ഐടി മേഖലയിൽ 5 ലക്ഷം തൊഴിലവസരങ്ങൾ സൃഷ്ടിക്കും: പിണറായി വിജയൻ

2031 ആകുമ്പോഴേക്കും വിവരസാങ്കേതിക മേഖലയിൽ 5 ലക്ഷം തൊഴിലവസരങ്ങൾ സൃഷ്ടിക്കുകയാണ് കേരളത്തിന്റെ ലക്ഷ്യമെന്ന് മുഖ്യമന്ത്രി പിണറായി വിജയൻ പറഞ്ഞു. ഇന്ത്യയുടെ ഐടി വിപണി വിഹിതത്തിന്റെ 10 ശതമാനം പിടിച്ചെടുക്കാനും ഗ്ലോബൽ കപ്പാസിറ്റി സെന്ററുകളുടെ എണ്ണം 120 ആയി ഉയർത്താനും സംസ്ഥാനം പദ്ധതിയിടുന്നുണ്ട്.

സർക്കാരിന്റെ വിഷൻ 2031 സംരംഭത്തിന്റെ ഭാഗമായി ഇലക്ട്രോണിക്സ്, ഐടി വകുപ്പ് സംഘടിപ്പിച്ച റീകോഡ് കേരള 2025 ഐടി സെമിനാറിന്റെ ഉദ്ഘാടന വേളയിൽ സംസാരിക്കുകയായിരുന്നു അദ്ദേഹം. ഇൻഫർമേഷൻ ടെക്നോളജി, ഇലക്ട്രോണിക്സ്, സെമികണ്ടക്ടർ, എമർജിംഗ് ടെക്നോളജി മേഖലകൾക്കായുള്ള കരട് വിഷൻ ഡോക്യുമെന്റും ചടങ്ങിൽ മുഖ്യമന്ത്രി അനാച്ഛാദനം ചെയ്തു. വ്യവസായ മന്ത്രി പി രാജീവ് രേഖ ഏറ്റുവാങ്ങി. ഭൂമിയുടെ ലഭ്യത പരിമിതമായതിനാൽ, അടിസ്ഥാന സൗകര്യ വളർച്ചയെ പിന്തുണയ്ക്കുന്നതിനായി ലാൻഡ്-പൂളിംഗ് മോഡലിലൂടെ സർക്കാർ സ്വകാര്യ നിക്ഷേപം പ്രോത്സാഹിപ്പിക്കുകയാണെന്ന് അദ്ദേഹം പറഞ്ഞു. ഡാറ്റാ സെന്ററുകൾ, ക്ലൗഡ് ഇൻഫ്രാസ്ട്രക്ചർ സൈറ്റുകൾ, സാറ്റലൈറ്റ് ഐടി പാർക്കുകൾ എന്നിവ സംസ്ഥാനം വികസിപ്പിക്കുമെന്ന് അദ്ദേഹം പറഞ്ഞു.